ചോറ്റാനിക്കര ദേവീ ക്ഷേത്രം

മുരിയമംഗലം ക്ഷേത്രത്തിന് ഏതാണ്ട് 2 കിലോമീറ്റർ തെക്കോട്ടു മാറിയാണ് വിശ്വപ്രസിദ്ധമായ ചോറ്റാനിക്കര ഭഗവതി ക്ഷേത്രം സ്ഥിതി ചെയ്യുന്നത്. പൗരാണിക കാലം മുതൽക്കേ ഇരു ക്ഷേത്രങ്ങൾ തമ്മിൽ അഭേദ്യമായ ബന്ധം ഉള്ളതാകുന്നു. കുംഭമാസത്തിലെ ഉത്സവത്തോടനുബന്ധിച്ച് ഭഗവതിയുടെ പ്രധാന ആറാട്ടായ “ഉത്തരം ആറാട്ട്” മുരിയമംഗലം ക്ഷേത്രത്തിലെ തീർത്ഥക്കുളത്തിൽ ആണ് നടക്കുന്നത്. ആറാട്ടിന് ശേഷം ശാസ്താസമേതനായി ഭഗവതി നരസിംഹസ്വാമി ക്ഷേത്രത്തിലേയ്ക്ക് എഴുന്നള്ളുകയും ക്ഷേത്ര ഗോപുര കവാടത്തിൽ വച്ച് ആചാരപൂർവ്വം ഭഗവതിയെയും ശാസ്താവിനെയും എതിരേറ്റ് നമസ്ക്കാരമണ്ഡപത്തിൽ നരസിംഹമൂർത്തിയ്ക്കു അഭിമുഖമായി ഇരുത്തി വിശേഷാൽ പൂജയും നിവേദ്യങ്ങളും നൽകി തുടർന്ന് മൂന്നു പേരെയും കൂട്ടി എഴുന്നള്ളിച്ച് ശീവേലിയും നടത്തിയതിനു ശേഷം ഭഗവതിയും ശാസ്താവും നരസിംഹസ്വാമിയോട് ഉപചാരം ചൊല്ലി തിരികെ ചോറ്റാനിക്കരയ്ക്ക് എഴുന്നള്ളുന്നു. ഈ ആചാരത്തിന് ഇടക്കാലത്ത് ഭംഗം വരികയുണ്ടായി. അതിന് ചരിത്രപ്രാധാന്യമുള്ള ഒരു കാരണവും ഉണ്ടായിരുന്നു.

കേരള സംസ്ഥാനം നിലവിൽ വരുന്നതിന് മുൻപ് മുരിയമംഗലം ദേശം തിരുവിതാംകൂർ നാട്ടുരാജ്യത്തിലും ചോറ്റാനിക്കര ദേശം കൊച്ചി നാട്ടുരാജ്യത്തിലും ഉൾപ്പെട്ടതായിരുന്നു. 1936 -ൽ അന്നത്തെ തിരുവിതാംകൂർ മഹാരാജാവായിരുന്ന ശ്രീ ചിത്തിര തിരുനാൾ ബാലരാമവർമ്മ ചരിത്ര പ്രസിദ്ധമായ ക്ഷേത്രപ്രവേശന വിളംബരം പുറപ്പെടുവിക്കുകയുണ്ടായി. ഇതിനെ തുടർന്ന് എല്ലാ ക്ഷേത്രങ്ങളിലും ദർശനം നടത്തുന്നതിന് എല്ലാ ജാതിയിലും പെട്ട ഹിന്ദുക്കൾക്ക് പ്രവേശനം ലഭിക്കപ്പെട്ടു. ഈ വിളംബരത്തോട് അനുഭാവം ഇല്ലാതിരുന്ന കൊച്ചി മഹാരാജാവ് തന്റെ നാട്ടുരാജ്യത്ത് ക്ഷേത്ര പ്രവേശനം നല്കാൻ തയ്യാറാകാതിരുന്നതോടൊപ്പം തിരുവിതാംകൂറുമായുള്ള ആചാരങ്ങൾക്ക് ഭ്രഷ്ട് കൽപ്പിച്ചു . കൊച്ചി രാജാവിന്റെ ഭ്രഷ്ടിനെ തുടർന്ന് ചോറ്റാനിക്കര ഭഗവതിയുടെ ഉത്രം ആറാട്ട് അന്ന് മുതൽ മുരിയമംഗലത്തേയ്ക്ക് എത്താറുമില്ല. വർഷങ്ങൾ ഏറെ കഴിഞ്ഞ് (കേരള സംസ്ഥാനം നിലവിൽ വന്ന ശേഷം) ഇരുക്ഷേത്രങ്ങളിലും നടത്തിയ അഷ്ടമംഗല പ്രശ്നങ്ങളിൽ അറ്റു പോയ ഈ ആചാരത്തെ പല കുറി പരാമർശിക്കുകയും ഇത് പുനഃസ്ഥാപിക്കണം എന്നതാണ് ദേവഹിതം എന്ന് ദൈവജ്ഞന്മാർ നിർദേശിക്കുകയും ചെയ്തതോടെ 76 വർഷത്തെ നീണ്ട ഇടവേളയ്ക്ക് വിരാമമിട്ട് കൊണ്ട് 2012 ൽ ഭഗവതി ഉത്രം ആറാട്ടിനായി മുരിയമംഗലത്തേയ്ക്ക് എഴുന്നള്ളുകയുണ്ടായി. തുടർന്ന് ഇന്നും ഇത് മുടങ്ങാതെ നടന്നു വരുന്നു.